De Ministère

Mission Statement

De Ministère fir auswäerteg an europäesch Ugeleeënheeten (gemengerhand den Ausseministère) bestëmmt d'Aussen- an EU-Politik vu Lëtzebuerg an e setzt s'ëm. Den Ausseministère koordinéiert d'Aussepolitik vun der Lëtzebuerger Regierung a beméit sech, an de Beräicher vun der Diplomatie, der Verdeedegung, der Entwécklung an der Awanderung e kohärent Konzept ze fërderen a gläichzäiteg déi lëtzebuergesch Intressen am Ausland z'ënnerstëtzen.

Lëtzebuerg ass Grënnungsmember vun deene meeschte groussen internationalen Institutiounen, ënner anerem vun der Europäescher Unioun a vun der Organisatioun vun de Vereenten Natiounen (UNO), a setzt sech besonnesch fir déi europäesch Integratioun a fir de Multilateralismus an. Déi lëtzebuergesch Diplomatie vertrëtt d'Wäerter vu Fräiheet, Fridden a Sécherheet, Demokratie a Mënscherechter, verantwortlecher Staatsféierung a Rechtsstaatlechkeet, Solidaritéit an Nohaltegkeet, an ass permanent beméit, de Respekt vum internationale Recht, dat d'Grondlag vun den internationale Bezéiunge duerstellt, ze schützen an ze stäerken.

Den Ausseministère a säin diplomatescht Netzwierk versichen, am Sënn vum Zesummenhalt a vun der Partnerschaft, d'Stabilitéit ze festegen an de Wuelstand unzekuerbelen. Déi lëtzebuergesch Diplomatie steet am Déngscht vun de Lëtzebuerger, vun de staatlechen Institutiounen, vum Privatsecteur a vun der Zivilgesellschaft, fir sämtlech lëtzebuergesch Intressen am Ausland ze vertrieden an ze verdeedegen, souwuel um politeschen an um konsularesche Plang wéi och an de Beräicher vun der Wirtschaft, vum Handel a vun der Kultur.

Déi lëtzebuergesch Diplomatie zeechent sech duerch hir Dynamik, hir Zouverlässegkeet an hire Professionalismus aus.

________________________ 

 

D'Zoustännegkeetsberäicher vum Ausseministère ginn duerch den Arrêté grand-ducal iwwert d'Bildung vun de Ministèrë bestëmmt.

Den Ausseministère besteet aus engem Generalsekretariat an aacht Direktiounen.

Déi fräi Plazen am Ministère ginn online um Site vun der Fonction publique verëffentlecht, mat Ausnahm vun de Wahlbeobachtungsmissiounen a vun den Ausschreiwunge fir Asätz an der Entwécklungszesummenaarbecht. Fir datt Är Kandidatur déi gewënschten Opmierksamkeet kritt, rode mer Iech, Iech un eisen Zerwiss ze wennen.

Déi ëffentlech Opträg vum Ministère ginn um Site vun den ëffentlechen Opträg ausgeschriwwen. Bestëmmten ëffentlech Opträg kënnen och an eiser spezieller Rubrik ervirgehuewe ginn.

Aktualiséiert